Një mbishkrim latin, që daton në shekullin e tretë pas Krishtit në Kështjellën e Rozafës, është një nga zbulimet më të rëndësishme të misionit shqiptaro-polak në Shkodër.
Zbulimi ka të bëjë me një dedikim që lidhet me emrin zyrtar të qytetit, colonia Scodranorum.
Për shkak të pamundësisë për ta vizituar në sit këtë objekt që qëndron mbuluar gjatë gjithë kohës nga uji, u bë i mundur riprodhimi i një kopje të tij.
Petrit Bilali, specialist i trashëgimisë jo materiale, drejtoria rajonale e trashëgimisë kulturore Shkodër shpjegoi në një intervistë për Euronews Albania se mbishkrimi i dedikohet një ushtaraku romak që kishte kontributet e tij dhe qyteti i Shkodrës i bën dedikimin përkatës në një shtatore.
“Shkrimi është latin dhe ka përmasa 65 cm me 90 cm, faqja ku është bërë kopja. Mbishkrimi i dedikohet një ushtaraku romak që kishte kontributet e tij dhe qyteti i Shkodrës i bën dedikimin përkatës në një shtatore. Shkrimi nuk është përkthyer ende në shqip dhe anglisht”, tha Bilali, teksa tregoi se vështirësia për të realizuar kopjen ishte i madh pasi mbishkrimi është nën ujë.



